पुणे : ख्यातनाम नाटककार, लेखक आणि शब्दप्रभू कवी राम गणेश गडकरी यांच्या १०१व्या स्मृतिदिनानिमित्त २३ जानेवारी २०२० रोजी पुण्यातील संभाजी उद्यानातील मुख्य दरवाज्याजवळ त्यांच्या प्रतिमेची व साहित्याची पूजा करण्यात आली. महाराष्ट्राचे वैभव असलेल्या गडकरींचा पुतळा संभाजी उद्यानात पुन्हा बसवण्यात यावा, अशी आग्रही मागणी या वेळी करण्यात आली आणि तो पुतळा बसवेपर्यंत पाठपुरावा करणार असल्याचा निर्धारही या वेळी व्यक्त करण्यात आला.
या वेळी लेखक, नाट्य कलावंत श्रीराम रानडे म्हणाले, ‘आज गडकरींना मला वंदन करायला मिळते हे अभिमानास्पद आहे.’ गडकरींच्या स्मृतिशताब्दीनिमित्त त्यांच्या
‘एकच प्याला’ या संगीत नाटकाच्या प्रयोगाच्या निमित्ताने युवा पिढीला गडकरींची ओळख करून द्यायची संधी मिळाली, याचा अभिमान असल्याचे अभिनेते विजय गोखले म्हणाले.
रंगकर्मी योगेश सोमण म्हणाले, ‘तीन वर्षांपूर्वी ज्या समाजकंटकांनी संभाजी उद्यानातील गडकरींचा पुतळा तोडला, त्याचा आम्ही निषेध करतो. पुतळा बसविण्यासाठी रंगकर्मींतर्फे आंदोलन करू आणि पुतळा पुन्हा उभा राहीपर्यंत संघर्ष करू.’
‘मसाप’चे कार्याध्यक्ष मिलिंद जोशी म्हणाले, ‘भाषाप्रभू गडकरी हे मराठीचे वैभव आहे. गडकरींचा पुतळा पुन्हा उभा करू असे आश्वासन पुण्याच्या कारभाऱ्यांनी दिले होते. त्याचे पालन करून पुतळा लवकरात लवकर उभा करावा.’
कुसुमाग्रजांनी राम गणेश गडकरी यांच्यावर रचलेल्या ‘नमस्कार आहे’ या कवितेचे वाचन या वेळी विजय कुलकर्णी यांनी केले. या कार्यक्रमात आनंद पानसे, कवी राजन लाखे, प्रा. श्याम भुर्के, प्रा. क्षितिज पाटुकले यांनी आपली मनोगते व्यक्त केली.
कोथरूड नाट्य परिषदेचे अध्यक्ष सुनील महाजन यांनी प्रस्ताविक व कार्यक्रमाचे सूत्रसंचालन केले. या निमित्ताने दादोजी कोंडदेव आणि राम गणेश गडकरी यांचे पुतळे त्वरित बसवले जावेत यासाठी महाराष्ट्राचे मुख्यमंत्री उद्धव ठाकरे यांना सर्व रंगकर्मींच्या वतीने भेट घेऊन निवेदन देण्यात येणार आहे अशी माहिती देण्यात आली.
